Pasientaksjonen har som mål at undersøking og behandling av nakkeskadde ved Firda fysikalsk-medisinsk senter – og MRI ved Capio/Haukeland - skal bli ein del av det offentlege helsetilbodet. I dag opererer manuellterapeut Bertel Rune Kaale som del av primærhelsetenesta med kommunalt driftstilskot, men i praksis arbeider han som spesialist for hardt nakkeskadde frå heile landet som verken har fått diagnose eller behandling tidlegare. Både Kaale og pasientane fell mellom alle stoler i helse- og trygdebyråkratiet.
Initiativtakarane til aksjonen har hatt møter, og er i nær dialog, med Stortinget, Helse- og omsorgsdepartementet og Sosial- og helsedirektoratet (SHdir). I februar 2003 fekk SHdir i oppdrag av departementet å utgreie det siste nye innan diagnostisering og behandling av nakkeskadde i Norge. Overlege Jostein Kråkenes ved Nevroradiologisk seksjon på Haukeland unversitetssjukehus og Bertel Rune Kaale står for ny og banebrytande forsking på diagnostisering av nakkeskader – men var ikkje invitert til å delta i arbeidsgruppa.
I brev til departementet påpeika vi dette, og departementet anmoda så direktoratet om å ha møte med Kaale og representantar for pasientane. Møtet fann stad 25.januar 2006 og resulterte i at direktoratet føreslo at det vert oppretta eit forskingsprosjekt for å sjå på effekten av behandlinga hos Kaale sidan hans vitskapelege arbeid berre omfattar diagnostisering. Likeeins vart det føreslått at pasientar som vert med i prosjektet skal få dekka reise- og opphald. Departementet godkjende prosjektet, og SHdir ga i oppdrag til UNIFOB helse, eit forskingsselskap tilknytta Universitetet i Bergen, å gjennomføre prosjektet.
Pasientaksjonen har arbeidd vidare for at pasientane skal bli høyrde i prosjektprosessen. Vi har fått lovnad frå både Sosial- og helsedirektoratet v/prosjektdiretør Hans Petter Aarseth og UNIFOB v/professor og forskingsdirektør Hege Eriksen, om at Pasientaksjonen vil bli kontakta så snart UNIFOB overleverer prosjektskisse til SHdir og arbeidet tek til. UNIFOB hadde frist til 1. juni 2006 å levere prosjektskisse til direktoratet.
Pasientaksjonen arbeider imidlertid vidare for at alle skal få dekka undersøkjings- og behandlingsreisene fordi det ikkje finst andre adekvate tilbod til oss som pasientgruppe. Pr i dag står 90 Firdapasientar på adresselista til Pasientaksjonen. Landsforeningen for nakkeslengskadde – avdeling Oslo (LFN-Oslo) har lagt ut info om aksjonen på sin nettside www.lfn-oslo.org.
Firdapasientar som ynskjer å stå på aksjonens e-postliste, kan skrive til Marianne Sunde, Brannfjellveien 34, 1181 Oslo, eller sende ein e-post til mariasu@online.no
Oslo, juni 2006
Klikk her for utfyllande mediaomtale
